MIJARA DUDUYAN
Seîdê Nû çima evqas xwe ji siyasetê diparêze/xwe dide alî?
Bersiv: Ji bo ku ji jiyana herdemî ya ji mîlyar salan zêdetir re, bixebite û wê jiyanê bi dest bixe. Naxwaze bi awayekî fuzûlî tevlî salek-du sal jiyana dinyayê bibe û wê xebatê û bidestxistinê gorî wê bike. Hem ji bo xizmeta îman û Qur’anê ku ya herî girîng û herî pêwist û herî saf û ya herî rastîn e bi awayekî tundî ji siyasetê direve. Holê dibêje:
Ji ber ku ez kal dibim, ez nizanim ez ê ji niha û pê de çend salan bijîm. Nexwe, tişta ku ji bo min herî girîng ew e ku ez ji bo jiyana ebedî bixebitim. Navgîna yekê ya bidestxistina bexteyariya ebedî û mifteya wê îman e. Pêwîst e xebat ji bo wê bê kirin. Bes ji ber ku li gorî şerîetê ji hêla ilmî ve berpirsiyariyeke min heye ku menfaetê jî bidim mirovan ez dixwazim xizmetê bikim. Bes ew xizmet yan dê di derbarê jiyana civakî ya dinyayê de be, ew jî ji destê min nayê. Hem di demeke bifirtûne de xizmeteke saxlem nayê kirin. Ji ber wê çendê min dest ji wî alî berda û min xizmeta îmanê ku ya herî girîng e, herî pêwîst e, herî biselamet e tercîh kir. Ew heqîqetên îmanê yên min ji nefsa xwe bi xwe re bi dest xistîn û ew dermanên manewî yên min di nefsa xwe de ceribandîn da ku bikevin destê hinên din de jî ez wî deriyî vekirî dihêlim. Dibe ku Cenabê Heq vê xizmeta min qebûl bike û ji bo gunehên min yên berê bike kefaret. Ji bilî şeytanê recîm mafê tu kesî –bawermend be kafir be, sidîq be zindîq be- nîne ku di pêşber de derkeve. Lewra bêîmanî naşibe tiştên din. Dibe ku di zulmê de, di fisqê de, di gunehên mezin (kebaîr) de lezzeteke şeytanî ya bêqidûş (menxûs) hebe. Lêbelê, di bêîmaniyê de qet tu aliyên lezzetê tune ne, elema di nav elemê de ye, tarîtiya di nav tarîtiyê de ye, ezabê di nav ezabî de ye.
Va ye, destjêberdana xebata ji bo jiyaneka ebedî ya bêhed û hesab û xizmeta nûreke qudsî ya mîna îmanê û têketina lîstikên siyasetê yên ne lazim û bixeter, di vê dema kalîtiyê de ji bo mirovekî mîna bêeleqe, bi tenê û mecbûrî lêgerîna kefareta gunehên xwe yên berê çiqas dûrî aqil e, çiqas dijê hikmetê ye, çiqas dînîtî ye; yên dîn jî bin dikarin vê bizanin.
Lêbelê, eger tu bibêjî “Çima xizmeta Qur’an û îmanê men’a min dike?"
