(vêca) neteweyên dî bi niyeteke tolhildanê û bêpergal beşdarî cemaeta Hazretê Huseyîn bûbûn? ji ber wê çendê (rewşa di nav cemaeta Herzetê Huseyîn de) gelek li zora xîreta netewî ya Emewiyan çû, lewma bû sedema wê bûyera dilsoj ya meşhûr ya xedarane û bêmerhemet.
Ev her çar sedemên behsa wan hatî kirin yên zahirî ne. Lê dema ji aliyê çarenûsê ve lê bête nihêrîn… ji boyî Hezretê Huseyîn û xizmên wî seba wê bûyera dilsoj encamên axretê, selteneta rûhanî û pêşdeçûnên manewî yên welê derketine… ew ewqas bi qedr in ku ew zehmeta ku ji ber wê bûyerê kişandine hindik û erzan dimîne. Wek çawa leşkerek di bin saeteke êşkence de bête şehîdkirin mertebeyeke welê bi dest dixe ku yên din ancax bi xebata deh salan digihîje wê. Eger piştî ku ew leşker şehîd bû jê bête pirsiyarkirin dê holê bibêje: “Bi tişteke hindik min gelek tişt bi dest xistin.”
Wateya pirsa we ya çaremîn: Di axirzeman de piştî ku Hezretê Îsa Decal kuşt, mirov bi piranî tên ser dînê heq. Lê belê rîwayetên holê hene: “Li ser rûyê erdê heta yên ‘Ellah Ellah’ bibêjin hebin qiyamet ranabe. 1 Piştî ku holê bi gelemperî hatin ser îmanê dê çawa dîsa bi gelemperî bikevin nav kufrê?
Bersiv: Yên îmana wan zeîf in rîwayeta hedîsa sehîh ya “Dê Hezretê Îsa bêt, dê bi şerîeta Îslamê emelê bike û dê Decalî bikuje” 2 ji aqilî dûr dibînin. Eger rastiya wê baş were ravekirin, qet, “ji aqil dûrî”ya wê namîne. Holê: Wateya ku ew hedîs û hedîsên din yên derheqê Sufyan û Mehdî de vedibêjin ev e:
Di axirê zeman de dê du bûyerên bêdîniyê bi hêz bibin.
Ya yekê: Şexsekî felaket yê bi navê Sufyan ku dê di bin perdeya nîfaqê de pêxemberiya Ehmed înkar bike, dê bibe serokê ehlê nîfaqê û dê hewl bide ku şerîeta Îslamê xirab bike. Di pêşberê wî de zatekî nûranî yê bi navê Muhemed Mehdî, ku bi silsileya nûranî ya Ehlê Beytê ve girêdayî ye, dê bibe serokê ehlê welayetê û ehlê kemalê, dê wê cereyana munafiq ku şexsê manewî yê wî Sufyanî ye, bikuje û ji hev belav bike.
