Hûn ola xwe û axreta xwe di riya dinyaya xwe de gorî dikin. Helbet li gorî raza dijberiya di navbera me de -li gorî texmîna we- em jî berevajiyê we her dem amade ne ku dinyaya xwe di riya ola û axreta xwe de gorî bikin. Ku em salek-du sal jiyana xwe ya di bin serweriya we ya zalimane û hovane de bi zelîlî derbas bûbe, ji bo bidestxistina şehadeteke pîroz gorî bikin, ji me re dibe wek ava Kewserê. Bes, ez xwe dispêrim feyz û îşaretên Qur’ana Hekîm û ji bo ku we biricifînim ez we qet’î agahdar dikim ku:

   Piştî ku we ez kuştim hûn ê nekaribin bijîn! Bi destekî Qehar hûn ê zû ji dinyaya ku bihişta we ye û xweşewîsta we ye werin derxistin û hûn ê werin avêtin bo tarîtiyeke ebedî. Li pey min serokên we yên bûyîn Nemrûd dê gelek zû werin geberkirin û werin şiyandin ba min. Ez ê jî di huzûra îlahî de bi pêsîra wan bigrim. Bi avêtina wan ya bo esfelê safilînê ya ji aliyê Dadweriya îlahî ve ez ê tola xwe hilînim!

   Ey bextreşên ku ola xwe û axreta xwe difiroşin dinyayê! Eger we divê hûn bijîn, têkilî min nebin! Eger hûn têkilî min bibin, vêya zanibin ku dê tola min qat bi qat ji we were standin, biricifin! Ez ji dilovaniya Xwedê hêvî dikim ku: Mirina min dê ji jiyana min pitir ji olê re xizmetê bike û mirina min dê mîna bombeyê di serê we de biteqe û dê serê we belav ke! Eger wêrekiya we hebe de ka têkilî min bibin! Dema we kir, hûn ê bibînin jî! Ez di hember hemû gefên we de bi hemû hêza xwe vê ayetê dixwînim:

اَلَّذِينَ قَالَ لَهُمُ النَّاسُ اِنَّ النَّاسَ قَدْ جَمَعُوا لَكُمْ فَاخْشَوْهُمْ فَزَادَهُمْ اِيمَانًا وَقَالُوا حَسْبُنَا اللّٰهُ وَنِعْمَ الْوَكِيلُ