û ji wan re nîşan dide ku mirin îdama ebedî ye û gor deriyê jihevveqetaneke ebedî ye.
Gelo berjewendiya karesatzede û nexweş û yên ji jiyana xwe bê hêvî bûyîn ku beşa duduyan e di terbiyeya şaristaniyê ya mîna firenk-meşreban û bê olan de ye? Hal bi hal ew reben nûrekê dixwazin, teseliyekê dixwazin. Di hemberî karesatên xwe de xelatekê dixwazin. Dixwazin ewdîna xwe ji zordestan hilînin. Dixwazin dehşeta wê gora ku nêzik dibin ji ser xwe biavêjin. Bi hemiyeta mîna ya we sextekar hûn derziyê dixin dilê wan karesatzedeyên belengaz yên gelek layiq û hewceyî piyariyê, pêşabûnê, tedawiyê, hûn mîrkutan li serê wan dixin! Bi awayekî bêmerhemet hûn hêviya wan dişikênin, hûn dixin nav bêhêvîtiyeke tam de. Hemiyeta netewî ev e? Berjewendiya hewe holê digihê netewayê?
Taîfeya sisêyan yên kal in, ji sisêyan yekê pêk tê. Ev nêzîkî gorê dibin, nêzîkî mirinê dibin, ji dinyayê dûr dikevin, nêzîkî axretê dibin. Berjewendî û nûr û sebirpêanîna van ma qey di guhdarîkirina serbihûriyên xedar yên zalimên mîna Hûlago û Cengîz de ye? Yan jî di tevgera we ya niha ya axretê dide jibîrkirin, bi dinyayê ve dide girêdan, bênecam, ji aliyê manewî ve ketin (lêbelê) ji aliyê zahirî ve pêşdeçûn e de ye? Û ma qey nûra axretê di sînemayê de ye? Û qey xemrevîniya rastî di şanoyê de ye? Ev kalên belengaz yên daxwaza rêzê ji hemiyetê dikin.. hûn rabin fikra “hûn ber bi îdama ebedî ve tên ajotin” bidine wan ku eva hanê herwekî ku hûn bi kêreke manewî wan jê bikin e; hûn wê gora ku ew weke deriyê rehmetê tesewûr dikin ji wan re bikin deriyê ejdehayî û hûn ji wan re bibêjin ku; “hûn ê herin wir”; eger evên hanê hemiyeta netewî bin, sedhezar carî ez bi Xwedê xwe ji wê hemiyetê diparêzim!..
Taîfeya çaran zarok in. Ev dilovaniyê ji hemiyeta netewayî dixwazin, li benda piyariyê ne. Giyanê van ji aliyê hejarî û bêhêziyê ve bi naskirina Afirînerekî dilovan û bi hêz vedibe, behreya wan bi bextewarî xuya dibe. Di hemberî rewşên dijwar yên paşerojê de bi telqîna tewekuleke îmanî û teslîmeke Îslamî ew masûm dikarin bi awayekî muştaqane li jiyanê binêrin. Gelo ma qey di waneyên pêçdeçûna şaristaniyê yên pêwendiya wan pê ve tune ye û di hîndekirina dîstûrên felsefeya bênûr û sirf madî ya hêza manewiya wan bişikêne û giyanê wan bitefîne de ye?
