Lewra teklîfa îlahî bi îrsalê (şandina pêxemberan) dibe û îrsal jî bi hayjêçêbûnê (itilaê) teklîf teqerûr dibe. Hemin xeflet û derbasbûna demê olên pêxemberên berê veşartine; ew ji dema ehlê fetretê re nabe delîl. Îtatê bike jê re dibe xêr, neke ezabî nabîne. Lewra ji ber ku veşartî maye nabe delîl.

   Nukteya Şeşemîn: Hûn dibêjin: Gelo ji kalikên Resûlê Ekrem Eleyhûsalâtû Wesselam pêxember derketine?

   Bersiv: Piştî Cenabê Îsmaîl Eleyhisselam delîleke mîsoger tune. Bi navê Xalid Îbnî Sînan û Henzele du pêxemberên ne ji kalikên wî hatine. Bes ev helbesta navdar û serîh û di awayê tensîsê de ya Ke’b Îbnî Lûey ku ji kalikên Pêxember e,

عَلٰى غَفْلَةٍ يَأْتِى النَّبِىُّ مُحَمَّدٌ  *   فَيُخْبِرُ اَخْبَارًا صَدُوقًا خَبِيرُهَا

dişibe gotineke mîna mucîzeyan û ya mîna pêxemberan.

   Îmamê Rebanî xwe hem bi delîlê hem bi keşfê girtiye û gotiye ku: Li Hindistanê gelek pêxember hatine. Bes, hinek ji ber ku qet ûmeta wan çênebûne yan jî bi çendek mirovan tenê bisînor mane navên wan derneketine yan jî navê pêxemberan ji wan re nehatiye dayîn.

   Vaye li ser vê distûra îmam, gengaz e ku di nav kalikên Pêxember de pêxemberên holê hebin.

   Nukteya Heftemîn: Hûn dibêjin: Xebera herî saxlem û rast ya der barê îmana dê û babê Resûlê Ekrem Eleyhîselatû Weselam û kalikê wî Evdilmutelib de çi ye?

   Bersiv: Seîdê Nû ev deh sal in ku kitêbên din li cem xwe nahêle, dibêje Qur’an besê min e. Di meseleyên teferûatê yên holê de dema min derfetê nade ku ez hemû kitêbên hedîsê vekolim û ya herî saxlema wê binivîsim. Bes ez ê vî qasî bibêjim ku dê û babê Resûlê Ekrem Eleyhîselatû Weselam ehlê necatê ne û ehlê Bihiştê ne û ehlê îmanê ne. Cenabê heq, helbet dilê bimbarik yê Hebîbê xwe yê Ekrem û şefqeta ferzendane (ya layiqî kurîtiyê) ku di wî dilî de ye, rencîde nake.

   Eger were gotin: Hemin welê ye; çima ew di îmana Resûlê Ekrem Eleyhîselatû Weselam de biser neketin? Çima negihan pêxemberiya wî?