Ji ber wê çendê ye ku Îsewiyên ku ji aliyê dinyayê ve di mertebeyeke bilind de ne, xurûr û enaniyeta xwe muhafeze kirine, digel vê çendê oldarên hişkebawer yên mîna serokê berê yê Emrîkayê Wîlsonî derketine (çêbûne). Di nav îslamiyeta ku yekbûn bixwe ye de yên ji aliyê dinyayê ve di mertebeyeke bilind de ne yan dê dest ji enaniyet û xurûra xwe berdin yan jî dê oldariyê hinkê bihêlin. Ji ber wê yekê ye ku beşek (ji olê) bêgane dimînin, belkî dibin bêol.
Meseleya Şeşan: Em ê ji wan kesên ku di neteweyî û nijadperestiyê de rapiriyê (îfratê) dikin bibêjin ku:
Serê Pêşî: Rûyê vê erdê, xasma welatê me yê han, ji dema berê ve bi gelek koçberî û cihêrengbûnê ve rû bi rû maye; digel vê çendê piştî ku Navenda Hikûmeta îslamî li vî welatî de hate damezrandin, ji neteweyên din gelek (mirov) weke mozeqirtikê (perwane) xwe avêtine vir û li vî welatî bi cî û war bûne. Vaye li gorî vê rewşê ancax divê Lewhil Mehfûz vebibe hetanî ku neteweyên heqîqî ji hev cuda bibin. Nexwe, ku tevger û hemiyet li ser ramana heqîqî ya neteweyiyê were avakirin bêwate û gelek zerardar e. Ji ber wê çendê ye ku: Yek ji serokên neteweyiya neyînî û nijadperestan ku der barê olê de bêgane bû bêgav ma ku got: “Eger ziman û ol yek be netewe yek e.” Madem welê ye; divê ne li pêwendiyên neteweyiya rasteqînî were nihêrîn; divê li pêwendiyên ziman û ol û welêt were nihêrîn. Eger hersê yek bin, jixwe (dibe) neteweyeke bihêz e; eger yek ji wan kêm be dîsa di nava çerçeweya neteweyiyê de ye.
Ya Duduyan: Neteweyiya pîroz ya Îslamiyetê ji jiyana civakî ya zaroyên vî welatî re bi sedan fayde dane qezenckirin; em ê di nav wan feydeyan de duduyan beyan bikin:
Ewil: Ya ku jiyan û hebûna vê dewleta Îslamî ya ku sih milyon bû di hemberî dewletên mezin yên Ewropeyê daye parastin ev ramana ku ji nûra Qur’anê ya ku di nav artêşa vê dewletê de bû: “Eger ez bimrim ez şehîd im, eger ez bikujim ez xazî me.” Bi şewq û evîneke tam li rûyê mirinê nêriye û ew pêşwazî kiriye. Her tim Ewrope hejandiye. Gelo di dinyayê de mirov dikare di giyana leşkerên raman-besît û dil-safî de çi tişta ku bûbe sedema fedakariyeke bi vî rengî giranbuha (ûlwî) nîşan bide? Kîjan hemiyet dikare li şûna wê were deynan? Û jiyana xwe û hemû dinyaya xwe bi viyan pê bide gorîkirin?
