Eynen welê jî komîtaya civakiya Îslamê artêşeke mezin e, hatiye dabeşkirin bo qebîle û taîfeyan. Bes bi hejmara hezar û yek aliyên yekbûnê yên ‘yek yekê wan’ hene. Xaliqê wan yek e, Rezaqê wan yek e, pêxemberê wan yek e, qibleya wan yek e, kitêba wan yek e, welatê wan yek e; yek, yek, yek, yek.. bi qasî hezaran yek yek…

   Vaye evqas yek yek; biratî, hezkirin û yekbûniyê pêwist dikin. Nexwe, mîna vê ayetê (jî) îlan kiriye, dabeşkirina bo qebîle û taîfeyan ji bo hevnaskirinê ye, ji bo yekbûnê ye.. ne ji bo hev-înkarkirin û dijminayiyê ye!..

   Meseleya Sisêyan: Ramana netewperweriyê di vê sedsalê de gelek zêde pê de çûye. Xasma, zordestên Ewrope yên hîleker eva hanê di nav msilimanan de bi awayekî neyînî hişyar dikin; daku wan perçe bike û wan dabelîne.

   Hem di ramana netewperweriyê de zewqeke nefsanî heye; lezzeteke xefletkarane heye; hêzeke bêyom heye. Ji ber wê çendê, di vê demê de, ji wan kesên ku bi jiyana civakî ve mijûl in re “Dest ji ramana neteweyiyê berdin!” nayê gotin. Bes, ramana neteweyiyê du beş in. Beşeke wê neyînî ye, bêyom e, bi zerar e; xwedîkirina wê li ser daqurtina yên din e, li ser dijminayiya yên din dewam dike, bi awayekî hişyar tevdigere. Vaye ev sedema neyartî û kêşmekêşî ye. Ji ber wê çendê ye ku; di hedîsa şerîf de ferman kiriye: 

اَلْاِسْلاَمِيَّةُ جَبَّتِ الْعَصَبِيَّةَ الْجَاهِلِيَّةَ

 Û Qur’anê jî ev ferman kiriye:

اِذْ جَعَلَ الَّذِينَ كَفَرُوا فِى قُلُوبِهِمُ الْحَمِيَّةَ حَمِيَّةَ الْجَاهِلِيَّةِ فَاَنْزَلَ اللّٰهُ سَكِينَتَهُ عَلٰى رَسُولِهِ وَعَلَى الْمُؤْمِنِينَ وَاَلْزَمَهُمْ كَلِمَةَ التَّقْوٰى وَكَانُۤوا اَحَقَّ بِهَا وَاَهْلَهَا وَكَانَ اللّٰهُ بِكُلِّ شَىْءٍ عَلِيمًا