اِنَّا لِلّٰهِ وَاِنَّۤا اِلَيْهِ رَاجِعُونَ

Ji dêl te ve bêhna min fireh bû. Cenabê Heq ji bendeyekî xwe hez bike, dinyayê jê dide xeyidandin û wê jê re kirêt nîşan dide. Înşaellah tu jî ji çîna wan hezkeran î. Zêdebûna astengiyên li ber belavbûna “Peyvan” bila we xemgîn neke. Înşaellah ku ew mîqdara we belav kiriye bigihîje rehmetê, dê ew dendikên nûranî yên gelek bi ber û bereket pir kulîlkan vekin.

   Hûn hinek pirsan dikin. Birayê min yê ezîz, gelek ji wan Peyv û Nameyên ku hatine nivîsîn, bêyî vîna min û ji nişka ve diketin nav dilê min, baş çêdibûn. Eger ez bi vîna xwe û mîna Seîdê Berê bi hêza ilmê bihizrînim û bersivê bidim, ronahiyeke baş nade, kêm dimîne. Ev maweyeke ku ew maneyên ku dikevin dilê min (tulûatê qelbî) rawestiyane, qamçiya hafizeyê şikestiye; bes da ku bê bersiv nemîne, bo her yek ji wan ez ê bersiveke kurt binivîsim:

   Pirsa We Ya Yekemîn: Diaya herî baş ya ku bawermendek bo bawermendekî bike divê çawa be?

   Bersiv: Divê di nav sebebên qebûlê de be. Lewra dia di nav hin şert û mercan de qebûl dibe. Ew şert û mercên qebûlê hindî zêdetir bin, qebûlbûn jî zêdetir dibe. Ji nav wan: Wê dema ku diayê bike divê îstîxfara xwe bîne û bi vî awayî ji aliyê manewî ve xwe paqij bike; paşê divê selewata şerîf ku diayeke qebûlbûyî ye weke mehdêr bide û di dawiyê de jî selewatê bide. Lewra ew diaya ku bikeve navbera du diayên meqbûl qebûl dibe.

   Hem divê

بِظَهْرِ الْغَيْبِ

, ango “bi paşpenî jê re dia bike”; hem bi diayên me’sûr ên di hedîs û Qur’anê de ne diayan bike. Wek mînak bi duayên cemker yên mîna?

اَللّٰهُمَّ اِنِّى اَسْئَلُكَ الْعَفْوَ وَالْعَافِيَةَ لِى وَلَهُ فِى الدِّينِ وَالدُّنْيَا وَاْلاٰخِرَةِ

رَبَّنَۤا اٰتِنَا فِى الدُّنْيَا حَسَنَةً وَفِى اْلاٰخِرَةِ حَسَنَةً وَقِنَا عَذَابَ النَّارِ