Rewşeke civakî ya xemgîn û nexweşiyeke felaket ya jiyana civakî ku dilê Îslamê berdide girînê:

   “Di wê dema ku dijminên derve çêbûn û êrîş kirin, dijminayiyên hundirîn tête jibîrkirin û dev jê tê berdan.” Gelên herî koçer jî ev mesleheta civakî teqdîr kirine û pêk anîne, digel vê çendê çi li vê cemaetê Îslamê yê ku angaşt dikin ku ew xizmeta Îslamê dikin hatiye ku evqas dijminên wan yên li pey hev êrîşê dikin hene, lê ew dijminayiya hindik ji bîr nakin û bi vî awayî zemînê ji bo êrîşa dijmin amade dikin? Ev rewşa hanê ‘ketin’ek e, wehşetek e, ji jiyana civakî ya Îslamê re xiyanetek e.

   Meselokeke sedema îbretê: Ji nav koçeran, di nav eşîreta Hesenan de du qebîleyên/êlên dijminên hev hebûn. Dibe ku ji pêncî mêran bêhtir ji hev kuştibûn. Digel vê çendê dema du eşîrên mîna Sîpkan û Heyderan ketin pêşberî wan, herdu qebîleyên dijmin ew dijminayiya berê jibîr kirin û milê xwe dane hev û heta ew herdu eşîrên derve derdixistin dijminayiya hundir nedianîn bîra xwe.

   Va ye, gelî bawermendan! Gelo hûn dizanin ka çiqas dijminên ku di hukmê eşîran de amade ne ku êrîşê li ser eşîra ehlê îmanê bikin? Ji sed daîreyên mîna yê di nav hev de bêhtir hene. Mecbûr bûn ku di hemberî hemûyan de piştevaniya hevdu bikirina û dest bidana hev û xwe parastibûna. Ma ev alîgirtina xerezkarane û ev rika dijminane ya ku dibin sedema êrîşa wan û derî li ber ketina wan vedike ku ew bikevin herêma Îslamê, qet û qet ne layiqî ehlê îmanê ye? Ew daîreyên dijmin, ji ehlê delaletê bigre heta alema ehlê kufrê, heta karesat û ehwalê dinyayê… ev bêguman heftê cûre dijmin in ku di hemberî we de di rewşeke ziyandar de ne û li pey hev bi hêrs û aciz li we dinêrin. Çeka te ya bihêz û kozika te û keleha te ya di hemberî van hemûyan de biratiya Îslamê ye. Ku mirov vê keleha Îslamê bi dijminayiyên nehêja û bi behaneyan bihejîne çiqas dijê wijdanê ye û çiqas dijê mesleheta îslamê ye; vê zanibe û hişyar bibe.

   Di hedîsên şerîf de hatiye gotin ku “Di axirê zeman de hinek şexsên felaket û muzir yên mîna Sufyan û Decal dê bibin serokê minafiq û zindîqan û wê ji hêrs û jihevveqetana îslamê û însanan sûdê wergirin û wê bi hêzeke hindik mirovayiyê tarûmar bikin û wê alema Îslamê ya muezzem bixin bin esareta xwe.”