Mehmûdê Bîl-Îtlaq jî her dîsa ew tenê ye. Wek çawa perestî mexsûsê bi Wî ye, hemd û sena jî xasê bi Wî ve ye.
Qet gengaz e ku Sani’ekî Hekîm ê ku esmanan û erd afirandî vî mirovê ku encama herî girîng ya erdê ye û fêkiya herî mukemel ya gerdûnê ye, serberdayî bike, bispêre esbab û tesadûfê, wê hikmeta xwe ya fireh û mezin biguherîne beredayîbûnê (abesiyetê)? Haşa!
Qet gengaz e ku Zatekî ‘Elîm û Hekîm darekê bi girîngiyeke zêde tedbîr û teswîr bike, bi hikmet îdare û terbiye bike, lê paşê jî berê xwe nede mêweyên wê darê ku xaye û faydeyên wê ew in; (wan fêkiyan) ji dizan re berde, ku bibe xusar? Helbet nabe ku lê nenêre û girîngiyê nediyê. Girîngiya ku ji darê re tê dayîn bo fêkiyên wê ne. Vaye hişmendê (zî-şuûr) vê gerdûnê û fêkiya wê ya herî têkûz û encam û xayeya wê mirov (însan) e. Qet gengaz e ku Sani’ê Hekîmê vê gerdûnê hemd û îbadet û şukir û muhebeta ku fêkiyên van fêkiyên hişmendan e bide hin kesên din û (bi vî hawî) qîmeta wê hikmeta xwe ya fireh û mezin bike tune, yan jî karîna (qudret) xwe ya mutleq veguherîne nekarînê (eczê), yan jî zanyariya xwe ya zêde veguherîne nezanîne (cehlê)? Sedhezar carî haşa!
Mebesta Xwedê ya ji avakirina vê qesra gerdûnê candar in û ew mirovê ku bijareyê candaran e û şukir û îbadetên ku di hemberî wan nî’metan tên kirin in. Qet gengaz e ku ew şukir û îbadet ji bilî Sani’ê vê qesra gerdûnê ji hinên dî re herin. Û ew Sani’ê Zulcelal destûrê bide ku ew şukir û îbadeta ku xayeya esîl e ji hin dî re here?
Qet gengaz e ku (ew Xweda) bi nî’metên cur be cur yên bêhed û bêhesap Xwe bi hişmendan bide naskirin û bi mucîzeyên xwe yên heta tu bibêjî zêde Xwe bi wan bide naskirin û paşê jî şukir û îbadeta wan, hemd û muhabeta wan, naskirin (marîfet) û minêkariya wan ji sebeb û xwezayê re bihêle û qîmetê nede wan û hikmeta xwe ya zêde bide înkarkirin, selteneta rubûbiyeta xwe bike tune? Sedhezar carî haşa!
Qet gengaz e ku yê nekare biharekê biafirîne, nekare hemû fêkiyan îcad bike, nekare van hemû sêvên ku demxeya wan ya li ser rûyê erdê yek e çêbike, karibe sêvekê ku mînaka wan ya biçûk e biafirîne û weke nî’met bi yekî bide xwarin û şukira wî bidest bixe. Ji aliyê hemdê ve bibe hevparê Mehmûdê Bîl-îtlaq? Haşa!..
