Kelamê dehemîn:
وَهُوَ عَلٰى كُلِّ شَىْءٍ قَدِيرٌ
Ango Ew Wahid e, Ehed e. Qadîrê her tiştî ye, tu tişt lê giran nayê. Li cem Wî afirandina biharekê qasî afirandina kulîlkekê hêsan e. Afirandina Bihiştê qasî biharekê jê re rehet e. Ev berhemên hûnerî yên hed û hesap jê re neyîn ku di her rojê de, di her salê de, di her sedsalê de îcad dike şehdebûna hêza Wî ya bêdawî dikin, hem jî bi zimanên bêhed.
Vaye ev peyv jî mizgîniyeke holê dide, dibêje:
Ey însan! Ew xizmet û ubûdiyeta ku te kiriye di avê de naçe. Ciheke ku tê de xelat bête dayîn û ciheke bexteyariyê ji te re hatiye amade kirin. Ji dêl vê dinyaya te ya fanî ve Bihişteke baqî li benda te ye. Ew Xaliqê Zulcelal yê ku tu jê re perestiyê dikî û nas dikî, bila baweriya te û ewleyiya te bi soza Wî bêt. Ne qabil e ku Ew ji soza xwe vegere. Di karîna (qudret) Wî de ji tu aliyan ve kêmasî tune. Bêhêzî nikare têkilî karê Wî bibe. Wek çawa bexçeyê te yê kiçik afirandiye eynen welê dikare bo te Bihiştê jî biafirîne û afirandiye jî. Û soz ji te re dayiye; ji ber ku soz dayiye wê te têxe nav de (bihiştê de)
Madem em bi çavê xwe dibînin her sal li ser rûyê erdê ji sêsed hezarî zêdetir cûreyên heywan û nebatan û miletê wan tam, bêqusûr, bipîvan, bi lezeke zêde û bi hêsanî heşr û neşir dike; helbet ev Qedîrê Zulcelalê holê be, dikare soza xwe bicî bîne.
Hem madem her sal ew Qedîrê Zulcelal bi hezaran awayan mînakên heşrê û yên Bihiştê îcad dike; hem madem di hemû fermanên xwe yên semawî de soza bexteyariya sermedî û mizgîniya Bihiştê dide; hem madem hemû kirdarî û karên wî heq, rasteqîn û rastin û li gorî cîdiyetê ne, hem madem bi şahdebûna berhemên Wî hemû kemalat delîlên kemala Wî ya bêdawî ne û şahdebûna wê dikin û ji tu aliyan ve kêmasî û qusûr tê de tune; he madem bicihneanîna sozê, derew û xapandin xisleteke herî sik e û kêmasî û qusûr e, helbet û helbet wê ew Qedîrê Zulcelal û ew Hekîmê Zulkemal û ew Rehîmê Zulcemal soza xwe bicî bîne û deriyê bexteyariya sermedî veke.. belê ey kesên bawermend, dê we têxe wê Bihişta ku welatê eslî yê babê we Adem e.
