cilweyeke tenê ya bedewiya Wî hêjayî ya hemû mehbûban e.. herweha jiyaneke daîmî ya ezelî û ebedî ya Wî heye ku ji zewal û fenayê munezeh e, ji arîzeyên kêmasî û qisûrê berî ye. Vaye ev peyv bangewaziyê li cin, îns, hemû hişmend û ehlê muhebet û ehlê eşqê dike ku;

   Ji we re mizgînî! Me’bûdekî we yê Baqî heye ku birîna wê jihevveqetana we ya bêdawî ya ji hezjêkerên we derman dike. Madem Ew heye û baqî ye yên din çi dibin bila bibin meraq nekin. Ya rast ew bedewî, qencî, fezl û kemala di wan xoşewîstan de ku dibe sedema hezjêkirina we siha siheke zeîf ya cilweyeke bedewiya daîmî ya wî Mehbûbê Baqî ye, ku di gelek perdeyan jî de derbas bûye. Zewala wan bila we neêşîne. Lewra ewana çeşîdeke neynik in. Guherîna neynikan cîlweya rewneqa cemalê nû dike. Madem Ew heye, her tişt heye.

   Kelamê nehemîn:

بِيَدِهِ الْخَيْرُ

   Ango her xêr di destê Wî de ye, çi xêrên ku hûn dikin dikeve deftera Wî de, her emelê salih ê ku hûn bikin li cem wî tête tomarkirin. Vaye ev peyv bangewaziyê li cin û însanan dike, mizgîniyê dide wan û dibêje:

   Ey bêçareno! Dema hûn çûne goristanê: ‘Heywax! Malê me xirab bû, keda me di avê de çû. Em ê ji vê dinyaya xweş û fireh biçin, têkevin nava wê axa teng.’ Nebêjin û nekin hawar û bêhêvî nebin. Lewra her tiştê we tête parastin, her emelê we hatiye nivîsandin, her xizmeta we hatiye tomar kirin. Zatekî Zulcelal dê destheqê xizmeta we bide we. Her xêr di destê Wî de ye û dikare her xêrê bike. Ew Zatê Zulcelal dê gazî we bike, dê we demdemî di binê erdê de bihêle, paşê jî dê we bibe hizûra xwe. Xwezik li we ku we xizmeta xwe û erka xwe qedand. Zehmeta we bidawî hat, hûn ber bi rehetî û rehmetê ve diçin.  Xizmet û zehmetî qediya, hûn diçin da ûcreta xwe bistînin.

   Belê, Qadîrê Zulcelal, ku tov û dendikên ku rûpelên deftera emelî yên bihara derbasbûyî ne û sindoqukên xizmetên wan e diparêze û di bihara dî de hê geştir, belkî sed qatî ji eslê xwe biberekettir muhafize dike û direşîne; elbet encama jiyana we jî welê muhafize dike. Û dê xelata xizmeta we bi awakî zêde bide.